【雪梅思君】唱：黃秋田
唱出雪梅分恁聽 雪梅做人真端正
甘願為君守清節 人傳名 好名聲
勸恁列位注意聽 著學雪梅這路行
毋通學人做歹囝 無翁婿生囝歹名聲
正月算來人迎尪 滿街人馬鬧蔥蔥
前街鬧熱透後巷 人𤆬人 看迎尪
虧得雪梅守空房 十七八歲毋嫁翁
目屎流落目箍紅 願心守我囝親像人
二月算來春草青 草仔青青欲發穎
雪梅看囝喉就滇 春天雨 落袂離
花今毋繡布毋經 暝日哀怨靈桌邊
心肝死人做伊去 等底時才會得相見
二月算來二月閏 雪梅抱囝問灶君
問欲商輅的字運 問商琳 的亡魂
怎樣佮阮無緣份 做伊死去見閻君
予阮雪梅揣無君 心肝想那想那怨恨
三月算來是清明 家家戶戶上山頂
雪梅抱囝到墓前 墓桌前 排三牲
三杯老酒排頭前 一對白燭點兩爿
欲問墓紙硩墓頂 望商輅我囝會長成
四月算來是夏至 娘𡢃相招問尪姨
欲問商琳怎樣死 牽亡魂 來講起
歲壽食到五十四 一點風痰感入脾
食毋著藥才會死 誤雪梅青春少年時
五月算來人縛粽 江中鑼鼓鬧蔥蔥
有翁有婿欲遊江 虧雪梅 守空房
鸞鳳拆散薄情人 鴻雁分開在西東
商輅我囝遮細漢 等底時才會親像人
六月算來是半年 玉蘭開花白麵麵
南風吹來清芳味 𧌄蜅蠐 吼吱吱
聽見杜鵑叫聲悲 聲聲哭出苦傷悲
心肝死人做伊去 放細囝予我咧養飼
七月算來七夕天 牛郎織女在河邊
七月初七欲相見 恨商琳 早過世
前世註定歹八字 這世佮君袂團圓
歹命雪梅來嫁伊 欲見君除非著後世
八月十五月大光 雪梅思君入花園
看見百花開十全 看月光 想著君
十六年尾入君門 並無佮君睏仝床
雪梅思君心頭酸 欲見君除非入閻門
九月算來起九降 雪梅思君入繡房
提起針線繡花欉 繡雙鳳 雕牡丹
又繡一隻孤飛雁 天邊海角亂飛環
聲聲哭出真哀怨 虧雪梅佮你仝一款
十月算來北風寒 僥籠僥箱僥被單
提起商琳的長衫 毋愛看 傷心肝
前年花園相對看 今年放捒我孤單
提起衫褲予君換 燒予君陰間穿袂寒
十一月算來是冬節 家家戶戶人炊粿
有人咧炊有人做 虧雪梅 大慘悽
頭梳圓頭插白花 跤穿烏襪佮白鞋
身穿一領布紫花 抹粉打扮守寡體
十二月算來是年兜 家家戶戶人敬孝
雪梅點香到門口 跪落去 大聲吼
聲聲哭出我君兜 少年就欲再得老
毋願予人講一口 願心守我囝會出頭
唱出雪梅唸完全 雪梅思君真哀怨
一月思君想一款 恨商琳 大毋願
阮無僥你你僥阮 做你死去到黃泉
予我雪梅受苦戀 心肝想那想那怨嘆
留言列表
